2009年5月28日 星期四

粥粉麵飯糖水餐vs鮮奶果盤點心餐


鍾意邊面多D?(^_^)

第二輯「美女廚房」都做左應該有三分之一喇...
但係...硬係覺得比上輯差d野咁......

今集好明顯比上集加多左好多性感的場面
由美味天使最新果套新裝火辣過粥粉麵飯不少
到美少女廚神十個著左八個都係賣奶維生
本童子開始唔明:使唔使集集都係咁?

總覺得錢國偉齋靠sell性感美女的做法開始變得走火入魔......
已經變得有d冇理到內容質素......
「耳分高下」就係最明顯的例子
成個節目除左Sing之天使同哈林大哥間唔中爆下seed之外就真係冇乜野好睇......

幸好,「美女廚房」的『主菜』依然有睇頭
上兩集GEM果碟野真係笑到肚痛......
但係其他環節,可觀性比起上集真係低左截......

好似美少女廚神咁
上一輯都冇乜見到有咁多又U又V的場面
但係今輯暫時黎講除左住家菜同功夫女之外,差唔多全部都係『乳』分高下......
仲要有兩三個...個樣直頭係不敢恭維的level......
都有野睇0既...係好多時單調左d lor......


上一輯的美少女廚神三甲都不大需要靠「拋奶」上位......(左:JJ,右:Sukie/Chelsea)

偽Joey整餸就更加無厘頭
正如好多人所講,將街市行情的環節塞入去都唔知為乜
而且...早個零鐘頭先睇完成班大廚煮好餸(無記週日八點檔慣常都係播美食節目)
之後再睇番偽Joey煮,感覺總有d不甚了了的feel......

最後,真係唔明點解次次d助手們的第二造型都硬係差過第一造型......
「味分高下」由窄裙換成鬆身娃娃裙,都仲說得過(俾身材冇咁好的可以遮下)
「耳分高下」就真係...通街都話攪到變左中國城d舞小姐咁......
而家...由繼承上輯cosplay風格的傘裙變成黑色膠皮裙......
原本好有獨特風格的造型變成同好多啤酒妹/傳單妹差唔多咁......
最重要係...同個廠的佈景夾埋,違和感好強烈......

p.s. 關於個topic所講的問題,響tvb.com有人開左個投票,結果係......
http://forum.tvb.com/viewtopic.php?f=71&t=26766

後話:
今次呢篇文充分讓本童子明白響網上搵相絕非你地想像中一google就有幾萬張俾你揀咁簡單......
好似最頭果張粥粉麵飯合照,其實係花左三日三夜時間先搵到
其中搵到好多的相都不能用
不是太細張、唔齊人,就係成大個水印響正中心
結果...原本端午節前已經寫好的作品要到今晚先出得街......

下次真係要提早做資料搜集喇......

2009年5月18日 星期一

Leo‧Ronaldo‧Tevez

(講明先,呢度所講都係本童子依報導+訪問推出黎的;如果你一開頭就已經認定古巨基/鄭中基/黃柏高是但一個係賤精一條仆街一件的話,咁本童子都冇辦法......)

先要講一聲sorry...近排埋首於GTAIV同機戰K,成大半個月都冇寫過野......

呢期樂壇最紅的話題,當然就係古巨基轉會事件啦......
一路以黎,咁多人講黎講去其實都係得兩個版本:
  1. 係古巨基反骨,轉會仲要拖咁多人落水
  2. 係金牌出賤招,留唔住人就砌古巨基生豬肉搞臭佢個名
邊個版本先係真,而家都好難講;但係後者機會似乎高d...

鄭中基、梁漢文,點睇都似係箭在弦上焗住要插多兩刀
特別係鄭中基,一句「係咪兩父子先?!」...問你點避!

再加上傳出金牌打算血洗Paco嫡裔的消息
就更令人懷疑金牌究竟有幾多誠意同古巨基傾續約......
(當然,呢個消息亦有可能係接收古sir的唱片公司放出黎作反擊之用......)

只係...如果古sir真係要落戶蛋記的話,本童子真係覺得好失望lor......
唔係因為以後響某d林入面要負上[為$賣屎忽]的惡名
而係可以預見到古sir以後的歌路會更少發展空間......

其實自古sir由eei/華納轉去金牌開始
已經開始覺得佢d歌...應該點講呢...話係俗氣左又好似唔多恰當...但係又諗唔到更好的形容詞...
『必殺技』都仲可以接受
到『愛與誠』就真係頂唔順
如果去到蛋記...一間淨係識製造偶像的公司......
本童子真係唔敢諗以後的古巨基會唔會唱黎唱去都係得番果幾味......

點都好啦...古sir...本童子都覺得你應該係Tevez多過係Ronaldo的......


p.s. 始終...本童子都係懷念以前藝能動音時代同eei『假音雙絕』時代()的那個基仔......